Followers

Saturday, June 21, 2008

சென்னை வைணவக் கல்லூரியில் இட ஒதுக்கீடு மோசடி

ஆசிரியர் நியமனத்தில் தமிழருக்கு வேலை வாய்ப்பு மறுப்பு.

சென்னை, ஜூன் 20- சென்னை அரும்பாக்கத்தில் உள்ள தி.கோ. வைணவா கல்லூரியில் ஆசிரியர் நியமனம், மாணவர் சேர்க்கையில் மிகப் பெரிய அளவில் இட ஒதுக்கீடு மோசடி நடைபெறுவது தெரிய வந்துள்ளது. இந்த மோசடிக்கு அரசு அதிகாரிகள் சிலரும் துணை போய் இருப்பதாக் கூறப்படுகிறது.

சிறுபான்மைக் கல்லூரி என்ற தகுதியின் அடிப்படையில் இக்கல்லூரி இயங்கி வருகிறது.

1993 ஆம் ஆண்டிற்கு முன்னர் உரிமையியல் நீதிமன்றங்கள் மூலமாகவே மொழிச் சிறுபான்மைத் தகுதியைப் பெற முடியும் என்ற நிலை இருந்ததால், இக் கல்லூரியும் சென்னையில் உள்ள நீதிமன்றம் ஒன்றின் மூலம் இத்தகுதியை, சலுகைகளையும் பெற்று வருகிறது.

ஆனால் சிறுபான்மை கல்வி நிறுவனங்கள் தொடர்பான வழக்கை விசாரித்த உச்சநீதி மன்றம், கல்வி நிறுவனங்களுக்குச் சிறுபான்மை தகுதி வழங்கும் உரிமை மாநில அரசுக்கு மட்டுமே உண்டு என்றும், நீதி மன்றங்கள் மூலம் பெறப்பட்ட சிறுபான்மைத் தகுதி செல்லாது என்றும் அறிவித்தது.

அதைத் தொடர்ந்து தமிழ்நாட்டில் நீதிமன்றங்கள் மூலமாகக் கல்வி நிறுவனங்கள் பெற்ற சிறுபான்மைத் தகுதி நீக்கம் செய்யப்படுவதாக கடந்த 1998 ஆம் ஆண்டு ஜூன் 17 ஆம் தேதி தமிழகக் கல்வித் துறை வெளியிட்ட ஆணையில் தெரிவிக்கப்பட்டுள்ளது.

அதன்படி, வைணவா கல்லூரியின் மொழிச் சிறுபான்மைத் தகுதியும் நீக்கம் செய்யப்பட்டது.பின்னர் சிறுபான்மைத் தகுதி பெற வைணவா கல்லூரி எந்த முயற்சியும் மேற்கொள்ளவில்லை. இக்கல்லூரிக்கு சிறுபான்மைத் தகுதி வழங்கி அரசு எந்த ஆணையையும் வெளியிடவில்லை.

தமிழக அரசின் நிதி உதவி பெற்று நடத்தப்படும் இக்கல்லூரியில் 90 விழுக்காடு இடங்கள் அதாவது மொத்தமுள்ள 2 ஆயிரம் இடங்களில் 1800 இடங்களுக்கு இட ஒதுக் கீட்டின் அடிப்படையில் மாணவர்கள் சேர்க்கப்பட வேண்டும்.

ஆனால் தங்களைச் சிறுபான்மைக் கல்லூரி எனக் கூறிக் கொண்டு 50 விழுக்காடு இடங்களுக்கு மட்டுமே இட ஒதுக்கீடு கடைபிடிக்கப்படுகிறது.
இதனால் பிற்படுத்தப்பட்ட, மிகவும் பிற்படுத்தப்பட்ட, தாழ்த்தப்பட்ட வகுப்புகளைச் சேர்ந்த மாணவர்களின் இட ஒதுக்கீடு பறிக்கப்படுவதாகக் கல்வியாளர்கள் குற்றம் சாற்றியுள்ளனர்.

ஆசிரியர் நியமனத்திலும் இட ஒதுக்கீடு முறை முற்றிலுமாகக் கடைபிடிக்கப்படுவதில்லை. இதை அந்தக் கல்வி நிறுவனமும் ஒப்புக் கொண்டுள்ளது. இட ஒதுக்கீடு முறை கடைப் பிடிக்கப்படாததால் தமிழர்கள் அல்லாதவர்களே அங்கு ஆசிரியர்களாகப் பணியமர்த்தப்படுகின்றனர்.
--- viduthalai.com

No comments: