Followers

Thursday, May 29, 2008

ரத்தம் குடிப்பதும், குடலை உருவுவதும்தான் பக்தியா! ஆத்தா சொன்னதால் கொலை செய்தேன்!

ஆட்டுக்குட்டியை வாயால் கடித்து பலி கொடுக்கும் வழிபாடாம்!

ரத்தம் குடிப்பதும், குடலை உருவுவதும்தான் பக்தியா!

திருவள்ளூர், மே 19- திருவள்ளூரில் மாத்தம்மாள் சாமிக்காக ஆட்டுக்குட்டி ஒன்றை வாயால் கடித்து பலி கொடுக்கும் காட்டுமிராண்டித்தனமான நேர்த்திக் கடன் வழிபாடு நடைபெற்றுள்ளது (17.5.2008).

திருவள்ளூர் மாவட்டத்தில் ஊத்துக்கோட்டை, திருத்தணி, கே.கே. சத்திரம் போன்ற பகுதிகளில் தெலுங்கு மொழி பேசும் அருந்ததியர்கள் ஏராளமானோர் வசித்து வருகின்றனர். இவர்களது குல தெய்வமான மாத்தம்மாளை வணங்கி வழிபட்டு வருகின்றனர்.

திருவள்ளூர் ஆட்சியர் அலுவலகம் எதிரில் அருந்ததியின மக்கள் வசித்து வருகின்றனர். அவர்கள் தீ மிதி விழா மற்றும் லோகாத்தம்மன் கோயில் குடமுழுக்கு விழாவை நடத்தினர்.

இதில் ஒரு பகுதியாக நேற்று முன்தினம் ஆட்டுக்குட்டி ஒன்றை வாயால் கடித்து பலி கொடுக்கும் நேர்த்திக் கடன் செய்து மாத்தம்மாளை வழிபட்டனராம்.இதற்காக இரண்டு இளைஞர்கள் வாயில் வேப்பிலை கடித்து அருள் வந்ததாகக் கூறி ஆடினர். பின்னர் பலி கொடுக்கப்படும் ஆட்டுக்குட்டியை சிலர் பிடித்துக் கொள்ள இளைஞர்கள் ஆட்டின் கழுத்தை வாயால் கடித்தனர்.

ஆட்டின் குடலை ஒருவர் வாயால் கவ்வி, வேகமாக ஓடி வலம் வந்தார். மற்றொருவர் கழுத்து வெட்டப்பட்ட ஆட்டை அப்படியே வாயில் கவ்வியபடி வேகமாக ஓடினார். இந்நிகழ்ச்சியில் ஏராளமானோர் கூடி நின்று பார்த்துள்ளனர்.

பக்தி வந்தால் புத்தி போய்விடும், கடவுளை வணங்குபவன் காட்டுமிராண்டி என்று தந்தை பெரியார் கூறிய மொழிகள் நூற்றுக்கு நூறு உண்மையானவை என்பதற்கு இந்த நிகழ்ச்சி ஒன்று போதாதா?

ஒடுக்கப்பட்ட மக்கள் வாழ்வில் முன்னேற வேண்டுமானால், இத்தகைய மூடத்தனங்களிலிருந்து விடுபடவேண்டுமே! viduthalai.com
-------------------------------------------------------------
ஆத்தா சொன்னதால் கொலை செய்தேன்!

கோவில் காவலாளியைக் கொன்றவர் வாக்குமூலம்!

புதுக்கோட்டை, மே.28- புதுக்கோட்டை மாவட்டம், அறந்தாங்கி துரையரசபுரத்தைச் சேர்ந்தவர் கணபதி (45). இவர் அறந்தாங்கி வீரமாகாளியம்மன் கோவில் குளத்தில் மீன் குத்தகை காவலாளியாக இருந்து வந்தார்.

இவருக்கும் அவரது பக்கத்து வீட்டுக்காரரான சுந்தரேஸ்வரன் என்பவருக்கும் முன் விரோதம் இருந்து வந்தது. நிகழ்வன்று கோவில் குளத்தைக் காவல் காப்பதற்காக கணபதி சென்று கொண்டிருந்த போது, சமத்துவபுரம் அருகே வழிமறித்த சுந்தரேஸ்வரன் அரிவாளால் வெட்டி விட்டு ஓடிவிட்டார்.

கணபதி அதே இடத்தில் இறந்துவிட்டார்.சம்பவம் குறித்து அறந்தாங்கி காவல்துறை அதிகாரி அதிவீர பாண்டியன் வழக்குப் பதிவு செய்து சுந்தரேஸ்வரனைக் கைது செய்து காவல்நிலையம் கொண்டு வந்து விசாரித்தனர்.

மொட்டை தலை, கழுத்து நிறைய உத்திராட்சக் கொட்டை, நெற்றி நிறைய விபூதிப் பட்டையுமாகக் காட்சியளித்த சுந்தரேஸ்வரன் காவல துறையினரிடம் கூறும்போது,

இந்தக் கொலையை நான் செய்யவில்லை. ஆத்தா சொன்னதால் செய்தேன். மேலும் 2 பேரைக் கொலை செய்ய உத்தரவு கொடுத்திருக்கிறாள்.
அவர்களைத் தேடிக் கொண்டிருக்கிறேன் என்று சொன்னதைக் கேட்டு காவல்துறையினர் அதிர்ச்சியடைந்தனர். viduthalai.com

No comments: